Ósátt við að efast sé um gæði lýsis

Katrín Pétursdóttir, forstjóri Lýsis, hafnar því alfarið að vörurnar þeirra standist ekki gæðaskoðanir. Í neytendaþætti í danska ríkissjónvarpinu á dögunum var því haldið fram að Omega 3 vörurnar stæðust ekki þær gæðakröfur sem gerðar eru. Totox gildi sem notað er til að mæla þránun í olíu hafi verið í hærra lagi.

Það er ekki rétt að við komum illa út, það er túlkun þeirra sem voru með þennan danska þátt. Og ég skil ekki þessa umfjöllun hér heima sem snýst um það að hér sé eitthvað misjafnt á ferðinni. Ég trúi því ekki að menn haldi það að fyrirtæki sem er eitthvað virtasta fyrirtæki í sinni stöðu á heimsmælikvarða, sé að viðhafa einhver misjöfn vinnubrögð," segir Katrín.

Katrín segir að fyrirtækið fari eftir lyfjastöðlum og sé með lyfjaframleiðsluleyfi. „Út úr þessu húsi fer ekki varan nema að hún mæti þessum kröfum, þ.e. samkvæmt lyfjaeftirliti og gæðaúttektum," segir hún. „Þannig að það er ekki rétt að við höfum fengið einhverja falleinkunn," segir hún.

Katrín segir þessa umræðu um lýsið vera mjög leiðinlega. „Það er fullt af fólki sem nýtur ábatans af inntöku á lýsi daglega og þess vegna er það afskaplega leiðinlegt að þetta skuli vera véfengt á þennan hátt," segir hún.

Úttekt MATÍS fyrir Stöð 2 sem sagt var frá í gær, er ekki í samræmi við fullyrðingar danska ríkisútvarpsins.

Þá má skoða viðtal við Katrínu með því að smella á hlekkinn „Horfa á myndskeið með frétt“.