Hjaltalín kemur aðdáendum í opna skjöldu

Fregnir af plötunni koma aðdáendum sveitarinnar í opna skjöldu. Hjaltalín hefur látið lítið fyrir sér fara síðustu misseri. Meðlimirnir sjö hafa verið uppteknir við ýmislegt; nám, flugkennslu, kvikmyndir og önnur tónlistartengd verkefni. Þeir hafa hist reglulega til að skapa tónlist og í haust var sarpurinn orðinn það stór að ekkert annað var í stöðunni en að klára heila plötu sem nú hefur fengið nafnið Enter 4.

Nýja platan fetar í stór fótspor. Síðasta plata Hjaltalín, Terminal, kom út fyrir þremur árum, ef undan er skilin Alpanon, sem innihélt tónleika Hjaltalín og Sinfóníuhljómsveitar Íslands. Terminal hlaut einróma lof hér heima og erlendis, seldist í tíu þúsund eintökum á Íslandi og var valin plata ársins á Íslensku tónlistarverðlaunum. Hjaltalín var líka valin einn af nýliðum ársins 2010 af Clash Magazine.

Útgáfutónleikar Enter 4 verða 21. desember í Gamla Bíói í Reykjavík og 22. desember á Græna hattinum á Akureyri. Í kvöld heldur hljómsveitin hlustunarteiti á KEX. Þar verður myndband eftir bandaríska leikstjórann Yoonha Park við opnunarlag plötunnar, Lucifer/He Felt Like a Woman einnig frumsýnt. Myndbandið verður tekið til sýninga hér á Vísi á morgun.

Á KEX verður einnig opnuð ljósmyndasýning á verkum sem gerð voru fyrir umslag plötunnar. Yfirumsjón með upptökum hafði Sveinn Helgi Halldórsson, úr hljómsveitunum Ælu og Jan Mayen, en hann hefur lengi starfað sem hljóðmaður Hjaltalín. Platan var tekin upp í Samkomuhúsinu í Garði, sumarbústað við Hellisheiði, Sundlauginni, Langholtskirkju, Stúdíó Sýrlandi og víðar.

Hljóðblöndun og eftirvinnsla var í höndum Arons Þórs Arnarssonar og hljómjöfnun í höndum Alan Douches í West West Side Music. Sigurður Oddsson hannaði umslagið, en hann hannaði jafnframt umslagið fyrir fyrstu plötu Hjaltalín, Sleepdrunk Seasons. Sena gefur út.

Enter 4 fer í forsölu hjá Tónlist.is og á heimasíðu Hjaltalín, hjaltalinmusic.com, á morgun. Hún fer síðan í almenna dreifingu í verslanir um land allt í lok næstu viku.

Hér fyrir ofan má hlusta á lagið We af nýju plötunni.