Eir þarf "þolinmótt fjármagn“

Til að bregðast við fjárhagsvanda Eirar þarf stofnunin að fá lán til 30 ára upp á tvo milljarða króna eða selja eignir sem þegar eru veðsettar. Báðar leiðir eru torsóttar í augnablikinu.

Skipað var sérstakt teymi endurskoðendafyrirtækisins KPMG og lögmannsstofunnar Lex til að leysa fjárhagsvanda Eirar.

Hjúkrunarheimilið þarf 2 milljarða króna til að geta staðið við skuldbindingar sínar gagnvart ellilífeyrisþegum sem búa í öryggisíbúðunum sem Eir rekur, en íbúarnir þar hafa allir greitt Eir fyrir svokallaðan íbúðarrétt.

Kjarninn í lausn á fjárhagsvanda Eirar snýr að því að útvega þessa 2 milljarða króna, svo hjúkrunarheimilið geti staðið við skuldbindingar sínar.

Samkvæmt heimildum fréttastofu hafa eftir taldar leiðir verið skoðaðar:

Að hjúkrunarheimilið taki 2 milljarða króna lán til 30 ára. Svokallað „þolinmótt fjármagn."

Þessi leið er ekki auðsótt, enda eru flestar eignir Eirar þegar veðsettar lánastofnunum og þeir sem eru reiðubúnir að lána vilja eðlilega fá traustar tryggingar fyrir slíkum lánum.

Önnur leið er að selja eignir, þ.e hluta þeirra fasteigna sem hjúkrunarheimilið á en þar er í raun við sama vandamál að glíma. Stór hluti þessara eigna er veðsettur lánastofnunum. Samkvæmt upplýsingum fréttastofu hafa þreifingar við hugsanlega kaupendur ekki skilað árangri.

Þriðja leiðin sem hefur verið skoðuð er aðkoma ríkisins og verður sú leið ekki farin nema öll önnur úrræði þrýtur. Fjármála- og efnahagsráðherra sagði hins vegar fyrir helgi að það væri ekki sjálfgefið að sjálfseignarstofnun eins og Eir gæti leitað í faðm ríkisins þegar hún lendir í ógöngum. Ráðherrann vill því stíga varlega til jarðar þegar aðkoma ríkisins er rædd á þessum nótum.

Ljóst er af framansögðu að engar einfaldar eða sársaukalausar lausnir eru til á fjárhagsvanda Eirar. Enn um sinn þurfa því skjólstæðingar hjúkrunarheimilisins að bíða í óvissu um hvað framtíðin ber í skauti sér.