Kári brattur og fullur sjálfstrausts þrátt fyrir neikvæða afkomu

„Við erum á lygnum sjó og líður vel," segir Kári Stefánsson, forstjóri Íslenskrar erfðagreiningar um stöðu fyrirtækisins, sem tapaði 1700 milljónum í fyrra og er með neikvætt eigið fé upp á sex milljarða króna.

Frá þessu var fyrst greint í Viðskiptablaðinu í morgun.

Kári segir í samtali við fréttastofu Stöðvar 2 og Vísis að það sé galið að fjalla um rekstur Íslenskrar erfðagreiningar eins og um hvert annað fyrirtæki. Verðmætin í fyrirtækinu liggi miklu dýpra, eins og hjá verðmætum líftæknifyrirtækjum almennt og því eigi hefðbundnar afkomutölur ekki við.

„Allar þessar umfjallanir byggja á algjörum skorti á vilja til að skilja hvernig líftækniiðnaðurinn virkar. Öll okkar verðmæti liggja ekki í sjóðum heldur í hugverkaverðmætum. Ef þið ætlið að fjalla um Íslenska erfðagreiningu með sama hætti og útgerðarfyrirtæki við Eyjafjörð, þá fáið þið ekki mjög rétta mynd af stöðunni. Verðmæti fyrirtækisins liggja í þeim hugverkum sem fyrirtækið býr til," sagði Kári. Hann vildi að öðru leyti ekki tjá sig um afkomu fyrirtækisins í fyrra.

Rekstur deCode, fyrrverandi móðurfélags Íslenskrar erfðagreiningar ehf., lenti í hremmingum eftir hrun og í nóvember 2009 var Íslensk erfðagreining seld til félagsins Saga Investments LLC. Saga Investments er fjárfestingarfélag í eigu Polaris Venture Partners og Arch Venture Partners, sem eru þekktir fjárfestar í Bandaríkjunum á sviði líftækni.