Vettel fullkomnaði þrennuna á æfingum í Bandaríkjunum

Sebastian Vettel var fljótastur í öllum þremur æfingunum fyrir bandaríska kappaksturinn sem fram fer á morgun. Keppt er á nýrri braut Austin í Texas og hefur hún komið öllum ökumönnum á óvart.

Vettel getur orðið heimsmeistari um helgina, nái hann betri árangri en Fernando Alonso, ökuþór Ferrari-liðsins. Alonso er aðeins tíu stigum á eftir Vettel í titilbárattunni og óskar þess nú að Vettel geti ekki hámarkað árangur sinn í tímatökum fyrir kappaksturinn á eftir.

Tímatökurnar hefjast klukkan 18 að íslenskum tíma og eru í beinni útsendingu á Stöð 2 Sport.. Vettel er líklegastur til að setja besta tíma en Lewis Hamilton hefur einnig verið í góðu stuði og gæti vel skákað heimsmeistaranum. Þá lítur allt út fyrir að Pastor Maldonado geti komið á óvart í Williams-bílnum sínum.

Alonso er heldur ekki langt undan. Hann lauk æfingum gærdagsins í þriðja sæti og átti svo fjórða besta tíma í dag.