Vettel á ráspól í sínum hundraðasta kappakstri

Heimsmeistarinn Sebastian Vettel á Red Bull ræsir fremstur í bandaríska kappakstrinum á morgun. Hann átti besta tíma í öllum tímatökulotunum. Lewis Hamilton ræsir annar. Fernando Alonso, helsti keppinautur Vettel, ræsir aðeins áttundi.

Hamilton gerði harða atlögu að ráspól í síðasta hraða hringnum sem hann ók í tímatökunum. Allt leit út fyrir að hann væri að ná ráspólnum en Vettel, sem var aðeins á undan honum í brautinni, bætti hringinn sinn enn frekar á síðasta tímatökusvæðinu.

Alonso gæti verið í vandræðum í áttunda sæti. Áttundi rásstaður er á skítugari hluta brautarinnar og því gæti það gengið erfiðlega að ná því frábæru ræsingu sem hann þarf á að halda, vilji hann halda lífi í titilbaráttunni.

Romain Grosjean náði fjórða besta tíma í tímatökunni en fær fimm sæta refsingu því liðið neyddist til að skipta um gírkassa í bíl hans. Grosjean ræsir því níundi en liðsfélagi hans Kimi Raikkönen í fjórða á eftir Mark Webber, liðsfélaga Vettel hjá Red Bull.

"Ég er mjög ánægður með niðurstöðuna," sagði Vettel eftir tímatökuna. "Af því að brautin er glæný þá var hún ofboðslega sleip í byrjun. Það er samt bara smá gaman að skauta um. Ég er líka ánægður með að við áttum slysalausa tímatöku. Nú þurfum við setja einbeitinguna á okkur sjálfa til að ná titlunum."

Hamilton ræsir í öðru sæti, einnig á skítugari hluta brautarinnar, sagðist ekki hafa miklar áhyggur af því að komast ekki í gegnum fyrstu beygju. "Ég hef nú ekki áhyggjur af fyrstu beygjunni. Þó hún sé kröpp þá er hún mjög víð svo það er lítið sem getur farið úrskeiðis. Ég gæti líka haft rangt fyrir mér. Ég hef meiri áhyggjur af því að ræsa á skítugari hluta brautarinnar."

"Ég vil ekki vera fyrir Vettel því hann á mjög mikilvæga keppni fyrir höndum. En, ég vil vinna. Vettel verður að sætta sig við það," sagði Hamilton.

Jenson Button, liðsfélagi Hamilton hjá McLaren, ræsir í tólfta sæti. Hann þurfti að draga sig í hlé í annari lotu tímatökunnar því hann missti kraft frá vélinni.