Afleitar aðstæður á vegum

Ferðaveður á landinu er afleitt og er fólki ráðið frá miklum ferðalögum eins og stendur. Hvarvetna bætir í vind og víða eru hálkublettir og þæfingsfærð. Hálendið í heild sinni er talið ófært, umferðartafir víða um land og loks eru vegfarendur í ákveðnum landshlutum sérstaklega varaðir við hreindýrum.

Rok

Með kvöldinu bætir enn frekar í vind og ofankomu um landið austan og norðaustanvert og aðstæður á vegum þar verða því afleitar, N 18-25 m/s og snjókoma og skafrenningur, og enn hvassara í vindhviðum. Um landið norðvestanvert bætir í vind í kvöld, og fyrir miðnætti verður væntanlega komin N 18-25 m/s, hvassast á fjallvegum s.s. Steingrímsfjarðarheiði, Þröskuldum, Holtavörðuheiði og Vatnsskarði. Áframhaldandi éljagangur og skafrenningur takmarkar skyggni.

Á Suðausturlandi hvessir einnig, og má búast við N 20-25 m/s undir Vatnajökli og Eyjafjöllum. Þar má búast við vindhviðum um og yfir 40 m/s. Skyggni á þessum slóðum, sem og annar staðar á Suðurlandi hamlast vegna sand og öskufoks, og seint í nótt má gera ráð fyrir éljagangi frá Breiðamerkursandi og til austurs. Suðvestan og vestantil er áfram hvasst, N 18-23 m/s og vindvhiður 30-35 m/s, en hvassar vindstrengjum við fjöll s.s. á sunnanverðu Snæfellsnesi og á Kjalarnesi.

Færð og aðstæður

Óveður er á Kjalarnesi og við Akrafjall. Það eru hálkublettir á Gjábakkavegi og í sunnanverðum Hvalfirði.

Á Vesturlandi er hálka eða hálkublettir og skafrenningur á flestum leiðum. Hálka og skafrenningur er á Bröttubrekku. Hálkublettir og skafrenningur er á Holtavörðuheiði.

Á Vestfjörðum er þæfingsfærð og stórhríð á Steingrímsfjarðarheiði og snjóþekja og skafrenningur á Þröskuldum. Snjóþekja og stórhríð er á Gemlufallsheiði. Hálka eða hálkublettir og éljagangur eða skafrenningur er á öðrum leiðum. Ófært og stórhríð er á Klettshás. Ófært er á Hrafnseyrarheiði og Dynjandisheiði, einnig er ófært á Veiðileysuhálsi.

Á Norðvesturlandi er hálka eða hálkublettir og skafrenningur á flestum leiðum. Snjóþekja og stórhríð er á Þverárfjalli og á Vatnsskarði.

Á Norðausturlandi er hálka og skafrenningur á Siglufjarðarvegi, þæfingsfærð og stórhríð á Öxnadalsheiði og Víkurskarði. Þungfært og éljagangur er í Dalsmynni. Ófært er á Hólasandi. Snjóþekja og stórhríð er á Mývatnsöræfum, snjóþekja og óveður á Hófaskarði og hálka og óveður á Sandvíkurheiði. Hálka og skafrenningur eða éljagangur er á öðrum leiðum.

Á Austurlandi er ófært á Fjarðarheiði, í Oddskarði og á Fagradal og er beðið með mokstur, ófært er líka á Breiðdalsheiði og Öxi. Snjóþekja, hálka og stórhríð er á Möðrudalsöræfum og Vopnafjarðarheiði. Þungfært og skafrenningur á Vatnsskarði eystra. Hálka og óveður er á milli Breiðdalsvíkur og Hafnar. Snjóþekja eða hálka og snjókoma eða skafreningur er á öðrum leiðum.

Á Suðaustur- og Suðurlandi er óveður við Lómagnúp og undir Eyjafjöllum. Hálkublettir eru frá Kvískerjum að Vík.

Umferðartafir

Unnið er að viðgerð á brúargólfi Borgarfjarðarbrúar og er unnið á 2-3 bilum í einu. Búast má við einhverjum töfum en umferð er stýrt með ljósum. Þarna er unnið með vatn og því má búast við hálku á vinnusvæðinu í frosti.

Einnig er verið að breikka þverun Borgarfjarðar beggja vegna brúarinnar. Það á ekki að valda töfum en hraði er þó tekinn niður og vegfarendur þurfa að gæta varúðar. Áætlað er að verkið standi til 15. nóvember.

Hálendið

Ekki er fylgst með færð á hálendinu þegar komið er fram á þennan tíma en talið er að hálendisvegir séu flestir ófærir almennri umferð.

Hreindýr á Austur- og Suðausturlandi

Vegagerðin og Náttúrustofa Austurlands vara vegfarendur við umferð hreindýra á Austur- og Suðausturlandi.

Upplýsingarnar eru frá Veðurstofunni.