Strætófarþegar eiga að spenna beltin

Farþegum Strætó sem ferðast lengri vegalengdir á milli landshluta með vögnunum ber að nota bílbelti. Reynir Jónsson, forstjóri Strætó, ræddi bílbeltamál í útvarpsþættinum Reykjavík Síðdegis.

„Við sitjum við nákvæmlega sama borð og hver annar þegar að því kemur," segir Reynir. Fólki ber að nota bílbelti í strætó þegar það ferðast lengri vegalengdir rétt eins og í öðrum rútum.

Sú ranghugmynd virðist ganga á milli manna að strætisvagnarnir sem keyra á landsbyggðinni séu bara hefðbundnir gulir strætisvangar. Það segir Reynir ekki rétt, heldur séu þetta bara hefðbundnar rútur, búnar öllum öryggisbúnaði og bílbeltum sem krafist er.

„Við ætlumst til þess að farþegar spenni beltin," segir hann og á þá við strætisvagna sem aka utan þéttbýlis.

Innan höfuðborgarsvæðisins kemur hins vegar ekki til greina að skylda farþega til að nota belti. „Sko, þetta snýst um það hvort það eigi að tryggja hverjum einasta farþega sæti svo hann geti spennt sig. Kostnaðurinn við það myndi hlaupa á hundruðum milljóna því þá þyrftum við að margfalda strætisvagnaflotann," segir hann.