Bárujárnsþök fuku á Bergþórugötunni

Það er ekki hættulaust að vera á ferli í óveðri eins og því sem Íslendingar finna fyrir hvarvetna um land í dag. Á Bergþórugötunni fuku bárujárnsplötur af þökum og ljóst er að stórslys hefði orðið ef einhver hefði orðið fyrir þeim. Þegar Vísi bar að garði voru starfsmenn Reykjavíkurborgar í óðaönn að vinna við að koma böndum á þakplöturnar.

Samkvæmt upplýsingum frá Slysavarnarfélaginu Landsbjörg hafa um 85 aðstoðarbeiðnir nú borist björgunarsveitum á höfuðborgarsvæðinu vegna óveðursins sem gengur yfir. Hátt í 100 björgunarsveitamenn eru nú að störfum við að leysa verkefnin og verið er að kalla út fleiri.

Fyrr í morgun var mest um útköll í Mosfellsbæ og Grafarholti en nú streyma inn aðstoðarbeiðnir úr flestum hverfum, þar með talið nokkuð úr miðbæ Reykjavíkur.

Gert er ráð fyrir að veðrið nái hámarki hér á höfuðborgarsvæðinu á milli klukkan 11:00 og 13:00 en þá er gert ráð fyrir enn verra veðri en nú er.

Slysavarnafélagið Landsbjörg bendir fólki á að hringja í 112 - Neyðarlínu, þurfi það á aðstoð björgunarsveita.

Áttu myndir af óveðrinu? Sendu okkur þær þá endilega á tölvupóstinn ritstjorn@visir.is