Heilu byggðarlögin lokuð vegna óveðurs

Heilu byggðarlögin á Vestfjörðum, Norðurlandi og á Austurlandi eru einangruð þar sem samgöngur í lofti, láði og legi eru lamaðar.

Allir fjallvegir á Vestfjörðum, Norðurlandi og Austurlandi eru ófærir og víða geysar þar stórhríð þannig að Vegagerðarmenn geta ekki hafið mokstur. Frá Höfn í Hornafirði og vestur undir Hvolsvöll er mun minni snjór, en þó ekkert ferðaveður vegna mjög snarpra vindhviða, sandfoks og öskufoks. Fært er á milli þéttbýlisstaða á suðvesturhorninu en bálhvasst á Hellisheiði, í þrengslum, á Mosfellsheiði og á Grindavíkurvegi.

Allt innanlandsflug hefur legið niðri í morgun. flugfélag Íslands ætlar að kanna aðstæður upp úr klukkan þrjú og Ernir hafa ekki flogið í morgun. Horfur eru ekki góðar á síðdegisflugi.

Hvorki Breiðafjarðarferjan né Grímeyjarferjan hafa siglt í morgun, en Herjólfur fór í fyrstu ferð en átti í erfiðleikum með að leggjast að bryggu í Eyjum vegna hvassviðris. Verið er að meta hvort hann fer fleiri ferðir.

Veginum á milli Dalvíkur og Ólafsfjarðar hefur verið lokað vegna snjóflóðahættu, en samkvæmt upplýsingum Veðurstofunnar er hvergi snjóflóðahætta í grennd við byggð, að minnstakosti ekki enn sem komið er, En þar á bæ er fylgst grannt með framvindu mála.

Veðurstofan varar enn við vonskuveðri á öllu landinu næsta sólarhring með norðan stormi og vindhraða á bilinu 20 til 28 metrar á sekúndu með vindhviðum upp í 55 metra á sekúndu, einkum við fjöll sunnanlands. Spáð er talsverðri snjókomu snjókomu á Norður- og Austurlandi í dag. Ekkert ferðaveður verður á landinu næsta sólarhring, en vindur fer að aðeins að ganga niður um hádegi á morgun, þótt hvasst verði fram á kvöldið. en upp úr því fer að lægja á öllu landinu.