Gildi krefst þess að útboðið á Eimskip verði rannsakað

Gildi-lífeyrissjóður sendi Fjármálaeftirlitinu í dag beiðni um rannsókn á því hvort rétt hafi verið staðið að útboði á hlutafé í Eimskipafélagi Íslands. Einnig hvort útfærsla á kaupréttum til stjórnenda félagsins standist skoðun og samanburð við þá mynd sem dregin var upp af kaupréttum í skráningarlýsingu félagsins. Áður hafði Festa óskað eftir því að FME rannsakaði útboðið.

Forsvarsmenn Gildis-lífeyrissjóðs segja á vefsíðu fyrirtækisins að fyrirtækið eigi um 0,6% hlutabréfa í Eimskipafélagi Íslands sem sjóðurinn eignaðist í nauðasamningum félagsins á árinu 2009. Á aðalfundi félagsins þann 27. maí hafi legið fyrir tillaga að kaupréttaráætlun og hún samþykkt. Tillagan hafi gengið mun skemmra og verið um margt frábrugðin þeim kaupréttum sem síðar voru gerðir. „Í henni var ekkert fjallað um þá kauprétti sem veittir voru á árunum 2011 og 2012. Á aðal- og hluthafafundum félagsins á fyrrnefndum árum voru engar tillögur um frekari útfærslu kauprétta bornar undir hluthafa, hvorki um það hverjum yrðu boðnir slíkir kaupréttir né á hvaða gengi þeir skyldu vera," segir á vefsíðunni.

Þá segir að það sé vandséð að útfærsla kaupréttanna hafi verið í samræmi við starfskjarastefnu félagsins og lög um hlutafélög. Gildi sendi stjórnendum félagsins og Straumi, öðrum af umsjónaraðilum útboðsins, fyrirspurn vegna málsins þann 23. október. Svör við fyrirspurninni voru ófullnægjandi að mati Gildis.