Léttu á sökkvandi bátum

Björgunarsveitarmenn á Skagaströnd stóðu í ströngu í óveðrinu í dag við að bjarga bátum í höfninni.

Snjó kyngdi niður á Skagaströnd og var björgunarsveitin Strönd kölluð út þegar fimm bátar í höfninni voru orðnir svo yfirfullir af snjó að minnstu munaði að þeir færu niður. Ellefu björgunarsveitarmenn fóru á svæðið síðdegis í dag til að moka upp úr bátunum. „Þeir voru bara orðnir fullir af snjó. Þegar blotnar í því getur það skapað vandamál. Þetta tók svona tvo klukkutíma," segir Reynir Lýðsson, formaður björgunarsveitarinnar.

„Það er nú ekki mikill vindur hérna en aftur á móti mikill snjór. Það er í rauninni bara búið að vera dimmt, skyggnið mjög slæmt," segir Reynir. Hann segir að björgunarsveitarmenn hafi verið í viðbragðsstöðu í dag og hjálpað fólki að losa bíla sem festust í snjónum og fleira þess háttar.