Hátt í fimm hundruð útköll

Björgunarsveitir Slysavarnafélagsins Landsbjargar hafa sinnt hátt í 500 útköllum um land allt í dag. Verst hefur ástandið verið á höfuðborgarsvæðinu þar sem yfir 380 aðstoðarbeiðnir hafa borist. Einnig hefur ástand verið slæmt á Suðurlandi, frá Þorlákshöfn að Höfn.

Enn streyma inn aðstoðarbeiðnir á höfuðborgarsvæðinu en svo virðist sem þeim sé að fækka á Suðurlandi. Þó er enn nóg að gera hjá björgunarsveitinni í Vestmannaeyjum.

Meira hefur verið um stærri atvik í óveðrinu nú en oft áður. Mikið hefur verið um að húsþök séu að fara af húsum í heilu lagi, gámar fjúki, malbik flettist af vegum, rafmagnsstaurar brotni og bílar, hjólhýsi og aðrir tengivagnar fjúki eða hreinlega splundrist í rokinu. Nokkuð hefur verið um slys á fólki.

Um þriðjungur björgunarsveita landsins hefur tekið þátt í þessu starfi eða yfir 30 og hafa þær verið með 250-300 manns úti, meira og minna í allan dag.

Búast má við sterkum vindi víða á landinu á næstu klukkustundum en gert er ráð fyrir að veðrið gangi rólega niður á höfuðborgarsvæðinu eftir því sem líður á kvöldið og á morgun á landinu öllu.