Versta óveður í áraraðir

Hátt í fimmtíu hafa leitað á slysadeild Landspítalans vegna aftakaveðursins sem nú gengur yfir. Tjónið er gríðarlegt en um tvö hundruð björgunarsveitarmenn hafa verið að störfum við erfiðar aðstæður í allan dag. Þetta er versta óveður sem gengið hefur yfir landið í áraraðir.

Aftakaveður var um allt land í nótt og í morgun var fjöldi björgunarveitarmanna kallaður út til að aðstoða fólk í vanda.

Veðrið var einn verst á höfuðborgarsvæðinu þar sem þakplötur rifnuðu af húsum, rúður brotnuðu og gámar tóku á loft. Kalla þurfti eftir liðsauka frá björgunarsveitum á Suðurlandi og Suðurnesjum til að aðstoða á höfuðborgarsvæðinu.

Björgunarsveitarmenn hafa unnið við afar erfiðar aðstæður í allan dag líkt og má sjá í meðfylgjandi myndskeiði.