Stórhríð á Norðurlandi

Björgunarsveitir hafa verið að störfum á átján stöðum á landsbyggðinni, og slæmt ástand hefur verið á Suðurlandi allt frá Þorlákshöfn að Höfn í Hornafirði. Þá hefur stórhríð geisað á Norðurlandi.

Ekkert ferðaveður hefur verið á svæðinu í allan dag og hefur snjónum bókstaflega kyngt niður. Blindbylur var út við Hofsós og gjörsamlega vitlaust veður í Hegranesi. Eða eins og fréttaritari okkar í Sauðárkróki komst að orði: Það hefur verið illviðri í dag.

Flutningabílar frá Vörumiðlum eru nú stopp, en gámarnir fara að fjúka af þeim þegar vindhraðinn er kominn upp í 28 metra á sekúndu.

Í myndskeiðinu hér að ofan er rætt við íbúa á Sauðárkróki.

Bátar haldast enn á sínum stað í höfninni en fuglarnir hafa þar leitað í var í óveðrinu.

Fáir hafa verið á ferli á Sauðarkróki í dag. Þannig bárust fregnir af því að þeir sem áttu tíma í nuddi eða á snyrtistofum hafi afpantað og ákveðið að sitja heima, sérstaklega eldra fólk.

Samkvæmt veðurspá á heldur að bæta í vindinn næstu klukkutímana og ekki reiknað með að veðrið gangi niður fyrr en aðfararnótt sunnudags.