Sálarmorðingi og illmenni við Landakotsskóla

Fyrrverandi kennari við Landakotsskóla er sagður sálarmorðingi og illmenni í skýrslu rannsóknarnefndar kaþólsku kirkjunnar sem kynnt var í dag. Átta segjast hafa orðið fyrir kynferðislegu ofbeldi af hálfu kirkjunnar þjóna.

Rannsóknarnefndin var skipuð á síðasta ári til að rannsaka starfshætti og viðbrögð kaþólsku kirkjunnar á Íslandi vegna ásakana um kynferðisbrot eða önnur ofbeldisbrot. Þetta var í framhaldi af umfjöllun Fréttatímans um þessi mál.

Athygli vekur að nefndin kýs að halda nafnleynd meintra gerenda, nema séra Georgs, fyrrverandi skólastjóra Landakotsskóla, og Margrétar Muller, fyrrverandi kennara.

„Vegna þess hversu þátttaka þeirra er yfirgnæfandi í þessari skýrslu," segir Hjördís Hákonardóttir, formaður rannsóknarnefndarinnar.

Flestar þær ásakanir sem koma fram, eru þær í garð þeirra?

„Já, að nánast öllu leyti," segir Hjördís.

Af þeim þrjátíu sem greindu nefndinni frá ofbeldi, sögðust átta hafa orðið fyrir kynferðisofbeldi, fáeinar frásagnir voru af líkamlegu ofbeldi en 27 greindu frá því að hafa orðið andlegu ofbeldi.

Meðal þeirra sem komu fyrir nefndina var karlmaður sem sagði frá ítrekuðu kynferðislegu ofbeldi af hálfu Margrétar og séra Georgs á árunum 1978 til 1983 og sagðist hafa gert nokkrar tilraunir til að segja frá áður.

Í flestum tilfellum er það séra Georg sem sagður er hafa beitt kynferðislegu ofbeldi.

Margrét kom við sögu í öllum frásögnum af andlegu ofbeldi. Hún var sögð hreinræktaður sadisti, ógeðfelld, geðveik, sálarmorðingi og illmenni.

Hjördís segir að nefndarmenn telji að það hafi verið almenn vitneskja um þessa háttsemi hennar og séra Georg hafi farið fremstur í að þagga slíkt niður.

„Hins vegar að fleiri hafi haft vitneskju um þessa háttsemi hennar og það falli undir skilgreiningu á þessu hugtaki já, þöggun," segir Hjördís.