Veðrið fer að ganga niður uppúr hádegi

Ekki er útlit fyrir að veðrið gangi niður fyrr en upp úr hádegi á morgun. Fólk er hvatt til að halda sig innandyra og taka ekki óþarfa áhættu.

„Veðurspáin gerir ráð fyrir því að það verði mjög vont veður fram að hádegi á morgun," sagði Víðir Reynisson, deildarstjóri almannavarna Ríkislögreglustjóra í kvöldfréttum Stöðvar 2. Hann segir að veðrið gangi upp og niður til skiptis og brýnir fyrir fólki að láta ekki blekkjast þó vindurinn detti niður um stund. „Þetta kemur upp aftur. Þannig verður þetta alveg fram undir hádegi á morgun," segir hann.

Hann hvetur fólk til að hafa varann á, halda sig innandyra og fylgja öllum viðvörunum og tilmælum sem gefin hafa verið.

„Eins og ég segi, þetta er bara eitt versta veður sem við höfum sé í fjölmörg ár. Það hefur mikil og alvarleg áhrif og fólk á að taka þessu mjög alvarlega," segir Víðir.