Ein milljón án rafmagns í Bandaríkjunum

Meira en ein milljón býr við rafmagnsleysi í Bandaríkjunum og hefur gert það í tæpa viku eða allt frá því að ofsaveðrið Sandy gekk yfir Austurströnd landsins.

Michael Bloomberg borgarstjóri New York þykir orkufyrirtækin ekki hafa staðið sig sem skyldi við að koma rafmagni aftur á og hvetur þau til að vinna hraðar í sínum málum.

Óttast er að enn verði rafmagnslaust á nokkrum svæðum á þriðjudag þegar forsetakosningarnar í landinu fara fram og að einhverjir kjörstaðir verði því lokaðir.

Staðfest tala látinna er nú komin upp í hundrað og sex í Bandaríkjunum en Sandy varð þar að auki sextíu og níu að aldurtila á nokkrum eyjum í Karíbahafi.