Pústrar, ölvun og fjársvik

Mikil ölvun var í miðbæ Reykjavíkur í nótt með tilheyrandi pústrum og ölvunarlátum. Tíu gista fangageymslur lögreglunnar á höfuðborgarsvæðinu eftir nóttina, þar af einn fyrir fjársvik.

Þrír fengu gistingu í fangaklefa því þeir áttu ekki í nein hús að venda. Hinir voru þar vistaðir vegna ölvunar og óláta, og fyrir að neita að hlýða fyrirmælum lögreglu.

Tveir voru teknir vegna gruns um ölvun við akstur.

Lögreglumenn þurfti að hafa afskipti af og stöðva nokkur partí í heimahúsum. Þá hafði lögreglan afskipti af tveimur veitingastöðum þar sem dyraverðir voru við vinnu án þess að hafa til þess réttindi.