Bílasala jókst um tæp 60% í október

Bílasala jókst um tæp 60 prósent í október, samanborið við sama mánuð í fyrra. Forstjóri Brimborgar segir bílasölu þó enn langtum minni en fyrir hrun.

Nokkur lægð hefur verið yfir bílasölu hér á landi eftir hrun en hún er nú að taka við sér á ný. Það sem af er ári hafa ríflega 7.300 bílar selst, þar af langt í sjötta hundrað í október.

„Það er greinileg breyting, greinileg aukning," segir Egill Jóhannsson, forstjóri Brimborgar. „En auðvitað er rétt að nefna að markaðurinn í fyrra og undanfarin ár hefur verið mjög lítill, þannig að prósentuhækkanirnar eru miklar."

Bílasala í október var 58 prósentum meiri en á sama tíma í fyrra. Í september var hún 65 prósentum meiri.

Þegar fyrstu tíu mánuðir ársins eru skoðaðir er salan 56 prósentum meiri en á sama tímabili á síðasta ári. Þar af er aukning á sölu til bílaleiga 42 prósent, en aukning til almennings og hefðbundinna fyrirtækja er 70 prósent.

Egill telur tvær meginástæður vera fyrir aukningunni.

„Fyrri er að efnahagslífið er að ranka við sér. Við sjáum það í tölunum að landsframleiðsla er að aukast og einkaneysla er að aukast, þannig að það hjálpar og að einhverju leyti þessar lagfæringar á skuldum heimila. Hin stóra ástæðan er að bílaflotinn er orðinn mjög gamall þannig að það er komin mjög mikil þörf á að endurnýja."

Þrátt fyrir þessa aukningu er bílasalan ekki orðin nærri eins mikil og fyrir hrun.

„Nei, langt því frá. Ég tók nú saman meðaltal bílasölu síðustu 40 ár á Íslandi og það erum 10 þúsund bílar á ári."

Hann tekur fram að margt hafi breyst á þessum árum, fólksfjöldi aukist og sömuleiðis fjöldi fyrirtækja. Samt stefnir í að aðeins 7.500 til 8.000 bílar seljist í ár.

„Þannig að við erum enn 20 til 25 prósent undir fjörutíu ára meðaltali. Þó að vöxturinn sé ágætur þá erum við enn langt undir því sem hefur verið hér undanfarin ár."