Mikill stuðningur við Betra líf

Hátt í 80 prósent þeirra sem tóku afstöðu í skoðanakönnun Gallup eru hlynnt því að 10 prósent af áfengisgjaldi renni til nýrra úrræða fyrir áfengis- og vímuefnasjúklinga og fjölskyldu þeirra.

Gunnar Smári Egilsson, formaður SÁÁ, segir niðurstöðurnar vera í takt við það sem samtökin hafi orðið vör við. „Það er mikill og útbreiddur vilji meðal fólks að ráðist verði í þjóðarátak til að færa þolendum áfengis- og vímuefnavandans betra líf. Stjórnvöld hljóta að bregðast við með viðeigandi hætti. Það er ekki oft sem þau fá jafn skýr skilaboð frá kjósendum.," segir Gunnar.

Úrtak könnunarinnar var 150 og 613 svöruðu ekki. Fjöldi svarenda var því 837 eða 57.7 prósent.

Samkvæmt könnun Gallup segjast 26,2 prósent landsmanna vera að öllu leyti hlynnt kröfunni, 20,0 prósent mjög hlynnt og 19,8 prósent frekar hlynnt. Hins vegar segjast 7,7 prósent vera að öllu leyti andvíg kröfunni, 4,6 prósent mjög andvíg og 5,9 prósent frekar andvíg. Samtals sögðust því 66,0 prósent vera fylgjandi kröfunni, 18,2 prósent voru andvíg henni en 15,9 prósent tóku ekki afstöðu. Af þeim sem tóku afstöðu sögðust 78,4 prósent fylgjandi kröfunni en 21,6 prósent andvíg henni.

Meðal sveitarfélaga sem lýst hafa yfir stuðningi við kröfur SÁÁ eru Reykjanesbær, Árborg og Fljótsdalshérað.

Í morgun höfðu um 22.500 landsmanna skrifað undir kröfuna um Betra líf! á vefsvæði SÁÁ, saa.is. Þá segir Gunnar að búast megi við því að undirskriftirnar fari yfir 10 prósent af kosningabæru fólki á morgun eða allra næstu daga.

„Við munum safna undirskriftum út þessa viku og hugsanlega lengur," segir Gunnar Smári. "Á sama tíma vonumst við eftir viðbrögðum frá ríkisstjórn og Alþingi. Það hefur myndast almennur og breiður stuðningur við þessa réttlátu mannúðarkröfu og stjórnvöld hljóta að bregðast skjótt við," segir Gunnar.