Villi er sagður hafa leynt upplýsingum

Vilhjálmur Þ. Vilhjálmsson, fyrrverandi framkvæmdastjóri Eirar og núverandi stjórnarformaður, er sagður hafa leynt upplýsingum um slæma fjárhagsstöðu hjúkrunarheimilsins. Það hafi gert það að verkum að vandamálið uppgötvaðist mun seinna en ella.

Eins og fram hefur komið í fréttum Stöðvar 2 þá er hjúkrunarheimilið Eir tæknilega gjaldþrota með skuldir upp á átta milljarða og neikvætt eigið fé. Ástæðan er aðallega sú að lán hafa snarhækkað eftir kostnaðarsamar byggingarframkvæmdir eftir hrun og tekjur ekki staðist væntingar.

Sérstakt björgunarteymi undir forystu KPMG og Lex reynir nú að semja við lánadrottna, Íbúðalánasjóð og lífeyrissjóði. Það var einmitt Íbúðalánasjóður sem í byrjun september ráðlagði stjórn Eirar að leita aðstoðar eftir að starfsmenn sjóðsins höfðu yfirfarið reikninganna og komist að þeirri niðurstöðu að staðan væri afar þröng.

Það er nefnilega eiginlega ekki fyrr en í ágúst/september á þessu ári sem stjórnin kemst að því hversu alvarleg staðan er í raun og veru. Þegar nýr framkvæmdastjóri fór yfir stöðuna fóru grunsemdir að vakna.

Sá sem var framkvæmdastjóri á undan honum var Vilhjálmur Þ. Vilhjálmsson fyrrverandi borgarstjóri. Samkvæmt heimildum fréttastofu telja nokkrir af núverandi stjórnarmönnum að Vilhjálmur hafi vitað hversu alvarlega staðan var orðin strax sumarið 2011. En að hann hafi ekki upplýst stjórnina um stöðu mála og beinlínis leynt upplýsingu þar af lútandi.

Samkvæmt heimildum fréttastofu verður þetta rætt á fyrirhuguðum stjórnarfundi hjúkrunarheimilsins þar sem Vilhjálmur er nú stjórnarformaður. Þar að auki verður farið fram á það að Vilhjálmur víki úr stjórninni.

Vilhjálmur vildi ekki veita fréttastofu viðtal vegna málsins í dag.