Rolling Stone um Of Monsters and Men: Salurinn í Hörpu glataður

David Fricke tónlistargagnrýnandi Rolling Stone, eins virtasta tónlistartímarits í heiminum, fer fögrum orðum um Iceland Airwaves-hátíðina sem lauk í gær. Fricke þessi hefur komið hingað til lands síðustu ár og heillast mjög af íslenskum tónlistarmönnum og umstangi hátíðarinnar.

Hann missti af fyrsti degi hátíðarinnar vegna fellibyljarins Sandy sem reið yfir austurströnd Bandaríkjanna í síðustu viku en segist vera heppinn að hafa komist hingað þrátt fyrir allt.

Hann skrifar um marga tónlistarmenn sem komu fram á hátíðinni í ár, þar á meðal íslensku krakkana í Of Monsters and Men. Hann segir að hljómsveitin hafi selt yfir 250 þúsund eintök af plötu sinni, My Head Is an Animal, í Bandaríkjunum.

Fricke segir að orkan og gleðin sem hafi einkennt tónleikana þeirra á hátíðinni í fyrra hafi enn verið til staðar. En salurinn í Hörpu hafi alls ekki hentað þeim - svo virðist sem einhverskonar hljóðdeyfir hafi skemmt hljóminn þeirra. Hann segir að hljómsveitin hafi spilað fyrir 18 þúsund manns fyrir nokkrum mánuðum en hljómsveitin hafi aldrei náð til áhorfenda í tónlistarhúsinu, sem hafi verið um 1500 talsins.

Hann segir að þrátt fyrir allt sé íslenska hljómsveitin „fyrirbæri", og að tónleikarnir hafi verið á góðum tíma á röngum stað.

„Það eru margar ástæður fyrir því að ég kem alltaf aftur og aftur til Íslands og á Airwaves-tónlistarhátíðina - menningin og mikilfengleikinn í náttúrunni; gæðin og dýptin í tónlistinni; vinirnir sem ég hef eignast," skrifar Fricke og segir að hátíðin komi sér alltaf á óvart. „Ég býst við meira af því sama á næsta ári. Og ég veit að ég verð ekki fyrir vonbrigðum."

Hann fjallar meðal annars um Steindór Andersen, Dr. Gunna, Ghostdigital, Purkurr Pillnik, Ólöfu Arnalds og íslenska tríóið Epic Rain í pistli sínum.

Greinina má lesa hér.