105 reknir í síðasta mánuði

Alls bárust Vinnumálastofnun tvær tilkynningar um hópuppsagnir í október mánuði síðastliðnum. Samtals misstu 105 manns vinnuna í þessum tveimur uppsögnum sem voru annars vegar í verslunarrekstri og hinsvegar í samgöngum.

Þar er væntanlega um að ræða fyrirtækin Europris og Iceland Express, en fyrrnefnda fyrirtækið hætti starfsemi í mánuðinum og hið síðarnefnda rann inn í Wow Air sem kunnugt er.

Þetta er annar mánuðurinn í röð þar sem til hópuppsagna hefur komið, en í september var ein hópuppsögn tilkynnt Vinnumálastofnun og þá misstu vinnuna 31 einstaklingur í samgöngum og flutningum.

Samkvæmt morgunkorni Íslandsbanka virðast hópuppsagnir vera að skjóta upp kollinum á nýjan leik eftir að hafa verið á undanhaldi síðastliðið ár, en aðeins hefur verið tilkynnt um hópuppsagnir í fjórum mánuðum það sem af er þessu ári.

Auk þeirra uppsagna sem tilkynnt hefur verið um núna í haust var 68 manns sagt upp í rannsóknar- og þróunarstarfsemi i júlí sl. Þá misstu 21 manns vinnuna í byggingariðnaði fyrr á árinu og 5 í fiskvinnslu. Samtals hefur því 237 manns verið sagt upp störfum það sem af er þessu ári í hópuppsögnum. Þar af voru 45% í samgöngum og flutningum, 29% í rannsóknum og þróunarstörfum, 12% í verslun, 9% í byggingariðnaði og 5% í fiskvinnslu.

Þrátt fyrir þessar þrjár hópuppsagnir í haust eru uppsagnir af þessu tagi á undanhaldi, en á sama tíma í fyrra hafði 680 manns verið sagt upp störfum í samtals 10 hópuppsögnum samkvæmt Íslandsbanka.

Hópuppsagnir jukust gríðarlega í aðdraganda og kjölfar hrunsins. Þannig misstu 2.260 manns vinnu sína í hópuppsögnum árið 2008, 4.246 manns árið 2009 og 953 árið 2010.

Frá ársbyrjun 2008 og til dagsins í dag hafa 8.594 störf verið lögð niður með hópuppsögnum. Stærstur hluti þessara starfa hefur verið í mannvirkjagerð eða 41% af heildinni.