Segir Steingrím baða sig í kinnapúðri Evrópubandalagsins

Þingmaður Sjálfstæðisflokksins, Árni Johnsen, fór mikinn í ræðupúlti á fjórða tímanum í dag þegar rætt var um afleiðingar veiðigjaldsins á Alþingi. Þannig sá forseti þingsins, Ásta Ragnheiður Jóhannesdóttir, ástæðu til þess að minna þingmanninn á að gæta orða sinna í þingsal.

Í ræðunni gagnrýndi Árni afleiðingar veiðigjaldsins harðlega og beindi svo orðum sínum að Steingrími J. Sigfússyni, atvinnu- og nýsköpunarráðherra: „Það er ótrúlegt að ráðherra skuli leyfa sér og sýna þann kjark að sitja hér án þess að verða dreyrrauður í framan af skömm af þeirri stefnu sem hann reynir að framfylgja."

Árni bætti svo við: „Hann baðar sig í kinnapúðri Evrópubandalagsins sem hann makar á sig á hverjum degi og sleikir út um."

Hann sagði svo að „gamlagrænir kommúnistar" kunni ekki neitt annað en að búa til höft og vandamál þegar kemur að því að vinna og hugsa inn í framtíðina.

Ræðu sína lauk hann svo á því að stefna ríkisstjórnar væri sú að draga landsbyggðina ofan í svaðið með skemmdum og hryðjuverkum, „og þá verður auðvelt að gera okkur að hreppsómögum í Evrópusambandinu eða troða okkur inn í Kína," sagði Árni svo að lokum.