Ellefu ára drengur ekki nógu fatlaður fyrir Klettaskóla

Fatlaður ellefu ára gamall drengur úr Kópavogi fær ekki inngöngu í Klettaskóla, sérskóla fyrir fatlaða, þó að hann sé greindur fatlaður. Foreldrar drengsins sóttu um vist fyrir hann við skólann í apríl síðastliðnum en fengu synjun hálfum mánuði síðar. Þau kærðu málið til menntamálaráðuneytisins sem staðfesti synjunina í gær. Drengurinn er nú í almennum skóla en nýtur aðstoðar þroskaþjálfa, eftir því sem fram kemur í úrskurði menntamálaráðuneytisins.

Forsendur Klettaskóla og menntamálaráðuneytisins fyrir synjuninni eru þær að umsóknin um Klettaskóla hafi ekki verið borin fram með réttum hætti þar sem það er hlutverk Kópavogsbæjar að sækja um skólavist, en ekki foreldranna sjálfra.

Jafnframt segir í ákvörðuninni að Klettaskóli gerir þær kröfur að fyrir liggi greining frá Greiningar- og ráðgjafastöð ríkisins um að viðkomandi barn sé fatlað í skilningi laga um málefni fatlaðra. Slík greining lá ekki fyrir heldur lá fyrir greining frá stofnuninni um að drengurinn væri með væga þroskahömlun án viðbótarfötlunar og uppfyllti því ekki inntökuskilyrði Klettaskóla, sem kveða á um að skólinn sé fyrir nemendur með miðlungs, alvarlega og djúpa þroskahömlun eða nemendur með væga þroskahömlun og viðbótarfatlanir, t.d. einhverfu, hreyfihömlun og blindu.