Máttu skerða framlög til Sólheima

Alþingi var heimilt að skerða fjárframlög til Sólheima í fjárlögum fyrir árið 2009, jafnvel þótt búið hafi verið að gera þjónustusamning við stofnunina þar sem ráðuneytið skuldbatt sig til þess að tiltekin upphæð yrði veitt til starfseminnar með fjárlögum hvers árs. Þetta er niðurstaða sem Hæstiréttur Íslands komst að í dag, en hann sneri þar með við dómi Héraðsdóms Reykjavíkur frá því í júlí 2011.

Í dómnum kemur fram að félagsmálaráðherra gerði í maí 2004 þjónustusamning til loka árs 2008 við Sólheima þar sem ráðuneytið skuldbatt sig meðal annars til að leggja til að tiltekin fjárhæð yrði veitt til starfsemi Sólheima með fjárlögum hvers árs. Með fjárlögum ársins 2009 var fjárhæð til handa Sólheima skert um 4% frá því sem aðilar höfðu samið um.

Sólheimar höfðuðu mál á hendur ríkinu og krafðist stofnunin viðurkenningar þess að skerðingin hefði verið óheimil, þar sem hún bryti gegn ákvæðum stjórnarskrár, en til vara að viðurkennt yrði að Í hefði með skerðingunni vanefnt skuldbindingar sínar að samningnum. Í dómi Hæstaréttar var talið að Alþingi hefði haft vald til að ákveða fjárveitingu til Sólheima og að Sólheimar gætu ekki byggt rétt til frekari fjárveitingar á útrunnum samningi.