Óvíst með hljómsveitir sem eiga að spila á fimmtudaginn

„Þetta gæti mögulega haft áhrif á þær hljómsveitir sem spila á fimmtudaginn en eftir það erum við svo sem í góðum málum."

Þetta segir Kamilla Ingibergsdóttir, upplýsingafulltrúi Iceland Airwaves tónlistarhátíðarinnar sem hefst núna á fimmtudaginn.

Sem kunnugt er hefur stormurinn Sandy sett samgöngur úr skorðum víða á austurströnd Bandaríkjanna , jafnt á landi sem og í lofti.

Sextán hljómveitir og tónlistarmenn frá Bandaríkjunum eiga að spila á Iceland Airwaves í ár. Að auki koma um eitt þúsund tónleikagestir frá Bandaríkjunum, þarf af í kringum þrjú hundruð frá New York en borgin varð afar illa út úr veðurofsanum í gærkvöld og í nótt.

„Við erum auðvitað með varann á," segir Kamilla. „Fólk þarf bara að bíða og sjá. Þau eru æst að koma hingað og við æst að fá þau yfir."

Flugumferð hefur að mestu legið niðri í New York í dag. Vonast er til að JFK-flugvöllurinn í New York verði opinn á morgun en ljóst er að LaGuardia verður lokaður á morgun.