Fær leyfi frá störfum vegna fjármálaumfjöllunar

Framkvæmdastjóri Slysavarnafélagsins Landsbjargar hefur óskað eftir leyfi frá störfum vegna blaðagreinar sem birtist í miðvikudagsblaði DV. Umfjöllunarefni hennar eru viðskipti sem hann tók þátt í tveimur árum áður en hann hóf störf hjá félaginu.

Guðmundur Örn Jóhannsson er framkvæmdastjóri Slysavarnafélagsins Landsbjargar en í tilkynningu frá Slysavarnarfélaginu Landsbjörg segir að hann hafi tekið þessa ákvörðun með hagsmuni Landsbjargar að leiðarljósi því aldrei megi leika vafi á trúverðugleika samtakanna. Þá segir að það sé ósk Guðmundar og stjórnar SL að þetta mál hafi hvorki áhrif á starfsemi félagsins né mikilvæga fjáröflun björgunarsveita um land allt.

Ásakanir um hundruð milljóna króna peningaþvætti

Málið tengist gríðarlega alvarlegum ásökunum sem bornar eru á framkvæmdastjórann og eru birtar á myndbandavefnum YouTube. Þar er framkvæmdastjórinn sagður skipuleggja hundruð milljóna króna peningaþvætti og gjaldeyrisbrask í höfuðstöðvum Slysavarnarfélagsins Landsbjargar.

Um helgina mun Slysavarnarfélagið Landsbjörg selja Neyðarkallinn um land allt. Það er önnur mesta fjáröflun félagsins, en sú mesta er vitaskuld flugeldasalan fyrir áramót.

Vísir birti hlekk á myndskeiðið í þessari frétt. Guðmundur Örn Jóhannsson, framkvæmdastjóri félagsins, krafðist þess, í tölvuskeyti, að það yrði tekið út, enda væri um að ræða tilbúning af ónefndum aðila sem gert væri í þeim tilgangi að skaða æru og trúverðugleika undirritaðs og Landsbjargar. Vísir hefur orðið við þeim tilmælum í bili.

Vísir hefur reynt að ná tali af Guðmundi í síma í morgun, en án árangurs.