Fá leitarskanna sem var notaður á Ólympíuleikunum

Fangelsið á Litla Hrauni hefur fjárfest í notuðum leitarskanna frá Ólympíuleikunum í London í sumar, sem starfsmenn og gestir þurfa að ganga í gegnum á leið sinni inn í fangelsið. Öryggismál hafa verið í ólestri á Litla Hrauni vegna fjárskorts enda segir forstöðumaður fangelsins að öryggismálin hafa verið keyrð á sveitamennskunni hingað til.

Engin aðstaða er á Litla Hrauni til að leita í vörum sem koma inn í fangelsið og hvað þá til að leita á fólki sem er að sækja fangelsið heim en alls eru heimsóknirnar um tuttugu þúsund á ári. Öryggismál hafa verið í miklum ólestri á hrauninu vegna fjárhagsskorts.

Margrét Frímannsdóttir, forstöðumaður Litla Hrauns, segir að öryggismálin hafi alls ekki verið nógu góð. „Núna þurfum við að taka okkur á ef við eigum að standa undir nafni sem fangelsi. Við þurfum að fá fjármagn til þess."

Nú á loksins að fara að setja upp sérstakt leitarhús á Litla Hrauni.

„Við ætlum að setja upp komuhús hérna og fáum í fyrsta skiptið leitarskanna, eins og eru á flugvöllunum. Það eru bæði gestir og starfsmenn sem þurfa að ganga í gegnum hann. Öryggisfulltrúinn okkar hefur verið að skoða þessi mál og hann rakst á einn skanna sem var á Ólympíuleikunum. Hann er lítið notaður og er eins og nýr. Við fáum hann á góðum kjörum."

Margrét segir að það sé alltaf verið að reyna að smygla einhverju inn í fangelsið og vinsælt sé að kasta hlutum yfir girðinguna.

„Ein leiðin er sú að henda yfir girðinguna. Við leitum hérna á hverjum degi, það er starfsfólk sem er í vinnu að leita á milli girðinga og hérna á útivistarsvæðinu."