Keyptu og seldu gjaldeyri á Lækjartorgi - lögreglan fylgdist með úr fjarska

Stjórn Heimdallar, félags ungra sjálfstæðismanna í Reykjavík, keypti gjaldeyri á Lækjartorgi í dag fyrir krónur. Samkvæmt tilkynningu frá Heimdalli þá komu margir með gjaldeyri og keyptu íslenskar krónur af Heimdellingum.

Viðskiptin fóru fram klukkan fimm í dag og voru auglýst í Morgunblaðinu í morgun. Lögreglan keyrði framhjá og fylgdist með án þess að stoppa viðskiptin, þó að þau séu með öllu bönnuð í lögum.

Hér fyrir neðan er ályktun stjórnar Heimdallar um gjaldeyrishöft.

Ályktun:

Stjórn Heimdallar, félags ungra sjálfstæðismanna í Reykjavík, telur brýnt að stjórnvöld afnemi gjaldeyrishöft sem allra fyrst.

Það er sjálfsögð krafa í vestrænu lýðræðisríki að hægt sé að eiga viðskipti með gjaldeyri á frjálsum markaði. Gjaldeyrishöft fela í sér gífurlega frelsisskerðingu og gerir Íslendinga að föngum í eigin landi.

Frelsi ungs fólks til athafna, m.a. að flytja eða ferðast úr landi, á ekki að vera háð geðþótta stjórnmálamanna eða embættismanna Seðlabankans. Því er mikilvægt að afnema gjaldeyrishöftin sem allra fyrst.

Með því að halda krónunni áfram er aðeins verið að reisa hærri girðingar á þá frelsisskerðingu sem Íslendingar búa nú við. Kostnaðurinn mun að lokum enda á yngri kynslóðum. Þjóðargjaldmiðill skerðir frelsi einstaklinga, af þeirri einföldu ástæðu að hann er ekki til fyrir fólkið heldur fyrir stjórnvöld til að fela agaleysi í ríkisfjármálum.

Það er hægt að afnema gjaldeyrishöftin með því að taka upp aðra mynt, hvort sem það er gert einhliða eða í samstarfi við annað ríki. Það er mikilvægt að bæði stjórnvöld sem og aðrir stjórnmálaflokkar hugi að þessu mikilvæga máli nú í aðdraganda kosninga.

Það eru ekki bara tveir kostir í boði líkt og nýleg skýrsla Seðlabankans um gjaldeyrismál gefur til kynna. Seðlabankinn telur þá kosti eingöngu í boði sem leiða til áframhaldandi tilvistar bankans. Það er skylda okkar allra að horfa til annarra lausna, jafnvel þeirra sem fela í sér niðurlagningu Seðlabankans.

Það er mikilvægt fyrir ungt fólk átti sig á hve slæm gjaldeyrishöft eru og hve slæmar afleiðingar þau geta haft á okkar kynslóð. Við viljum hafa aðgang að gjaldmiðli sem hægt er að nota hvar sem er, gjaldmiðli sem er stöðugur og heldur ekki aftur af frelsi okkar og tækifærum.