Vilji fyrir breytingum á meðferð kynferðisbrotamála

Þverpólitískur vilji er í allsherjar- og menntamálanefnd um breytingar á meðferð kynferðisbrotamála. Nefndin fundaði í þriðja sinn um málefnið í dag. Vonast er til að nefndin skili vinnu á þessum þingvetri.

„Okkur langaði að fjalla almennt um þessi mál og fá ólík sjónarmið um meðferð kynferðisbrotamála í dómskerfinu," segir Björgvin G. Sigurðsson, þingmaður Samfylkingarinnar og formaður nefndarinnar. „Þessi vinna okkar mun varpa ljósi á það sem betur má fara og hvað við getum gert til að styrkja þessi málefni hjá hverju lögreglustjóraembætti fyrir sig."

Fjöldi álitsgjafa hefur komið fyrir nefndina. Í dag sóttu fulltrúar lögreglustjórafélagsins fund nefndarinnar. Áður höfðu aðilar frá lögmannafélaginu, dómstólaráði og fleiri lýst skoðunum sínum á meðferð kynferðisbrotamála.

„Þetta hafa verið gagnlegir fundir. Við höfum náð að dekka allar hliðar á þessum málaflokki," segir Björgvin og tekur fram að fundurinn í dag hafi verið sá síðasti í bili. Því næst verður undirnefnd skipuð sem mun sjá um úrvinnslu gagna.

„Það er óviðundandi að þessi mál taki jafn langan tíma og raun ber vitni. Við viljum fá að bæta úr þessu og þverpólitískur vilji er fyrir málinu."