„Standi dómurinn kallar hann á breytt vinnubrögð“

„Ef þessi dómur stendur, þá mun hann hafa áhrif á vísindasamfélagið. Þetta mun hafa áhrif utan Ítalíu og við hér heima þurfum að hafa okkar mál á hreinu."

Þetta segir Páll Einarsson, jarðeðlisfræðingur og prófessor við Háskóla Íslands. Í gær voru sex ítalskir jarðvísindamenn dæmdir til sex ára fangelsisvistar fyrir að vanmeta hættu á jarðskjálfta.

Nokkrir litlir, en þó snarpir, jarðskjálftar riðu yfir ítalska bæinn L'Aquila og nágrenni hans á vormánuðum ársins 2009. Vísindamennirnir sex sátu fjölmennan fund í bænum 31. mars sama ár. Þeir héldu því fram að smáskjálftarnir væru ekki þess eðlis að hægt væri að gera ráð fyrir stærri skjálfta.

Alls fórust 309 þegar stóri jarðsjálftinn reið yfir L'Aquila. Hann var 6.3 að styrkleika og lagði bæinn í rúst. Vísindamennirnir sex voru dæmdir fyrir manndráp.

„Þessir menn eru dæmdir fyrir að gefa út umsögn sem segir að ekki sé hætta á jarðskjálfta, fyrir því voru í raun ekki góð gögn. Þeir telja fólki trú um að engin hætta sér á ferðum," segir Páll og bætir við: „Jafnvel þó að þeim hafi orðið á, þá er stóra spurningin sú hvort að það hafi verið hægt að gera þá ábyrga."

Þá segir Páll að mál sexmenningana komi til til með hafa víðtæk áhrif. En hvað með jarðvísindamenn hér á landi?

„Maður þarf að vanda sig meira en maður gert hingað til," segir Páll. „Ef dómurinn stendur þá mun þetta kalla á breytt vinnubrögð."