Mögulegt að skjálfti upp á 6,8 geti orðið

Nægjanleg spenna er til staðar í jarðskorpunni, þar sem jarðskjálftarnir við Siglufjörð hafa verið, til þess að skjálfti að stærðinni 6,8 geti orðið. Þetta kemur fram í frétt á vef Veðurstofunnar í dag, en þar er vísað í jarðskorpumælingar sem hafa veirð gerðar á síðustu árum.

Í fréttinni segir að þessi hrina sem verið hefur undanfarna daga sé við vesturenda Húsavíkur-Flateyjarmisgengisins og ekki sé tilokað að hrinan hafi áhrif á spennu umhverfis misgengið. Gliðnunin sem varð samfara Kröflueldum 1975-1984 hafi orðið til þess að spenna minnkaði á Húsavíkur-Flateyjarmisgenginu. Síðan þá hefur spenna verið að hlaðast upp.

Skjálftahrinan sem hófst á laugardag syðst í Eyjafjarðarál heldur áfram. Í gær mældust allnokkrir skjálftar á tímabilinu frá klukkan 1:00 til 8:00 á svæði nokkru suðaustan við þann stað þar sem meginhrinan og 5,6 skjálftinn voru staðsett. Þeir voru því heldur nær Húsavíkur-Flateyjarmisgenginu. Stærstu skjálftarnir þar, um 3,9 að stærð, urðu klukkan 5:25 og 5:32 í gærmorgun. Í gærkvöld kl. 21:16 varð skjálfti af stærðinni 3,5 og í morgun klukkan 5:27 mældist skjálfti af stærðinni 4,0 á svæðinu þar sem meginvirknin hefur verið og færðist hún því aftur til vesturs. Skjálftarnir eru hefðbundnir brotaskjálftar á flekaskilum og engin merki sjáanleg um eldvirkni.