Flokkadrættir og klækir þurfa að víkja

„Nú þurfa flokkadrættir og klækir stjórnmálanna að víkja fyrir almannahag og fumlausum vinnubrögðum allt til enda."

Þetta sagði Jóhanna Sigurðardóttir, forsætisráðherra, i skýrslu sinni um þjóðaratkvæðagreiðslu um tillögur stjórnlagaráðs á Alþingi í dag.

Jóhanna sagði niðurstöður kosninganna afar þýðingarmikið veganesti fyrir alþingismenn.

„Trúverðuleiki Alþingis er í húfi ef ekki verður brugðist rétt við þessum skýra vilja þjóðarinnar," sagði Jóhanna. „Þjóðinni hefur tekist það sem þingheimi hefur mistekist allt frá lýðveldisstofnun, að móta Íslandi nýja stjórnarskrá í stað þeirrar sem samþykkt var við lýðveldisstofnun til bráðabirgða."

Hún vonast til að forystumenn allra flokka ræði þetta mál á næstu dögum, meðal annars til að freista þess að ná samkomulagi um vinnulag og tímaramma fyrir umræður.

„Eðlilegt fyrsta skref ætti að vera að ljúka 1. umræðu um frumvarp að nýrri stjórnarskrá fyrir jól, afgreiða það til nefnda og ljúka síðan endanlegri afgreiðslu fyrir þinglok í vor."