Stór dráttarbíll valt í Kömbunum í morgun

Ökumaður slapp lítið meiddur en var fluttur á slysadeild til rannsóknar, eftir að stór dráttarbíll með aftanívagn fullan af ferskum fiski, valt í hálku í Kömbunum upp úr klukkan fimm í morgun.

Bíllinn var í neðstu beygjunni og á uppleið, þegar hann og vagninn ultu á hliðina og runnu þannig yfir veginn og út af honum, öfugu megin.

Svo vel vildi til að engin bíll kom á móti í þeirri andrá. Kassinn á dráttarvagninum brotnaði ekki í veltunni, þannig að fiskurinn dreifðist ekki um vettavanginn, en hann er í einni kös inni í vagninum og er tryggingafélag bílsins að skipuleggja björgun aflans.