Vara við erlendum tölvuþrjótum

Lögreglunni hafa borist nokkrar tilkynningar nýverið um að fólk sé að fá símtöl, ef til vill erlendis frá, þar sem hringjandi tilkynnir þeim að tölvan á heimilinu sé sýkt með vírus.

Viðkomandi leiðbeinir heimilisfólki síðan inn á ákveðna heimasíðu en þaðan eigi að ná í hugbúnað til að losna við vírusinn.

Margt bendir til að hér sé um svikastarfsemi að ræða til að ná yfirráðum yfir tölvum fólks. Mikilvægt er að fólk kanni vel hvað liggur að baki þegar slík símtöl berast og setji alls ekki upp neinn hugbúnað sem gæti mögulega opnað utanaðkomandi aðgang að tölvunni.

Ef fólk telur sig hafa orðið fyrir slíkum brotum er mikilvægt að taka tölvuna strax úr sambandi við internet og gera ráðstafanir um að láta skoða tölvuna með tilliti til slíkra óværa.