Segist líða eins og hann sé í ruslflokki

Tveggja barna faðir með ódæmigerða einhverfu hefur áhyggjur af stöðu sinni eftir að dómari úrskurðaði einhverfa móður forsjárlausa. Hann segir að sér finnist hann hafa verið settur í ruslflokk.

Við sögðum frá því í gær að dómari úrskurðaði barnsföður Láru Kristínar Brynjólfsdóttur fulla forsjá yfir sjö ára syni þeirra. Hún var fyrst í fyrra greind með einhverfu.

Þar á undan var hún nauðungarvistuð á geðdeild, ranglega greind með geðklofa og aðra sjúkdóma, en fyrir dóminn kom framkvæmdastjóri geðsviðs Landspítalans og sagði að Lára hefði fengið nýja greiningu sem væri einhverfa. Sú greining standi á fastari fótum en aðrar greiningar. Einhverfa væri fötlun en ekki sjúkdómur

„Ég á fjórtán ára strák og níu ára stelpu. Ég get ekki séð að ég hafi skaðað þau á einn eða neitt hátt. Ég skil ekki þessa niðurstöðu . Ég fékk mikið mikið sjokk. Við flestöll í einhverfusamfélaginu erum meðvitum um það sem er að gerast fyrir Láru. Mér finnst eins og við höfum verið sett í samfélagslegan og þjóðfélagslegan og réttarfarslegan ruslflokk með þessari niðurstöðu - og það er vond tilfinning," segir Hreiðar Þór Ørsted.

Lögheimili sonar Láru var fært til föður hans þegar hún var ranglega vistuð á geðdeild. Í rökstuðningi dómarans segir að föður sé dæmd forsjá: sérstaklega vegna þess að drengurinn hafi nú dvalið hjá honum samfleytt í tæp tvö ár og ekki hefur annað komið fram en að honum farnist vel, þykir óvarlegt að rjúfa þessi tengsl.

Í fréttum okkar í gær sagði einhverfuráðgjafi Láru að hún hefði fengið og ætti rétt á aðstoð við umönnun sonar hennar vegna fötlunar sinnar.

Dómari rökstyður mál sitt hins vegar þannig að samkvæmt matsgerð dómkvadds matsmanns og gögnum málsins að öðru leyti sé Lára ekki í stakk búin til að fara með forsjá sonar síns án utanaðkomandi aðstoðar.