Vilja breyta fánalögum til þess að auglýsa íslenskar vörur

Siv Friðleifsdóttir, ásamt nokkrum öðrum þingmönnum, vill breyta fánalögum þannig að fyrirtæki geti meðal annars notað hann við markaðssetningu á vörum.

Siv var í viðtali við Reykjavík síðdegis í dag þar sem hún útskýrði þessar hugmyndir.

„Þetta eru aðallega þessi atriði, að það sé leyfilegt að flagga allan sólarhringinn yfir bjartasta tímann, það er að segja frá 15. maí til 15. ágúst," sagði Siv í viðtali á Bylgjunni en hún segir ýmsa hafa fengið heimsóknir frá lögreglu vegna þess að þeir flögguðu lengur en löglegt er samkvæmt fánalögum yfir sumartímann.

Siv finnst það hinsvegar eðlilegt að hægt sé að flagga meira yfir sumarið, hún vill einnig breyta lögununum í þátt átt að hægt sé að flagga einnig á nóttunni yfir vetur svo lengi sem fáninn er lýstur upp.

„Við leggjum einnig til að það verði leyfilegt að nota fánann í markaðssetningu," segir Siv og útskýrir að ef lagabreytingarnar nái að ganga eftir þá megi nota fánann á vörur sem eru íslenskar að uppruna. Þetta mætti svo lengi sem fánanum yrði ekki gerð óvirðing.

„Það eru margir sem vilja sjá þetta verða að veruleika," segir Siv og bendir sérstaklega á bændasamtökin í þeim efnum.

Hægt er að hlusta á Siv hér fyrir ofan.