Lentu í Bergen og vissu ekki hvers vegna

Farþegaflugvél sem var á leið frá Berlín til Íslands lenti óvænt á miðri leið í Bergen í Noregi í dag. Vélin var full af fólki sem vissi hvorki ástæður lendingarinnar né hvenær þau færu aftur í loftið og kæmust til Íslands.

Vélin var frá flugfélaginu Wow air og var á leið til Íslands þegar öryggisljós kviknuðu í stjórnklefa vélarinnar. Samkvæmt öryggisreglum var ákveðið að lenda flugvélinni hið snarasta og ganga úr skugga um hvort hætta væri á ferðum.

„Þetta var algert minniháttar vandamál, ekkert alvarlegt," segir Svanhvít Friðriksdóttir, upplýsingafulltrúi Wow. „Það voru minniháttar þrýstingsbreytingar í farþegarými. Það var svo lítið að farþegar fundu ekki fyrir því sjálfir. En þegar svona ljós kvikna er öryggið í fyrirrúmi og vélinni er lent."

Farþegum var hins vegar ekki tilkynnt hvað var á seiði. „Einhverntíma á leiðinni byrjaði vélin að lækka flugið. Svo lentum við bara allt í einu og við fengum ekkert að vita fyrr en við lentum að við værum í Bergen í Noregi," segir farþegi úr vélinni.

Farþegunum var hvoki greint frá ástæðum lendingarinnar né hvenær von væri á því að vélin færi aftur í loftið. Þeir eru enn í Bergen og bíða tíðinda.

„Það er nú samt hugsað ágætlega um okkur. Við fengum matarmiða og þess háttar," segir farþeginn.

Samkvæmt upplýsingum frá Svanhvíti hjá Wow air fer vélin aftur í loftið innan skamms. „Það verða allir komnir heim í kvöld," segir hún.