Gat ekki sagt Ragnar og Brynjar

Hinn írski Graham Norton átti í erfiðleikum með að bera nöfn krakkanna í Of Monsters and Men fram. Hann gat þó sagt Nanna, en nöfnin Ragnar og Brynjar voru aðeins of erfið fyrir hann.

Íslenska hljómsveitin spilaði í gærkvöldi í þættinum The Graham Norton Show sem er vinsæll spjallþáttur í Bretlandi. Á meðal gesta í þættinum var Daniel Craig, sem leikur James Bond í myndinni Skyfall.

Þegar krakkarnir voru búnir að syngja lagið Little Talks, settust þau í settið ásamt öðrum leikurum úr myndinni. James Bond sjálfur stóð upp fyrir þeim og tók í höndina á þeim. Spjallþáttastjórnandinn átti erfiðleikum með að bera nöfnin þeirra fram, eins og sjá má í meðfylgjandi myndskeiði.

Þau sögðu frá nýju lagi sem þau eru að fara gefa út, sem heitir Mountain sound, en ekki er komin dagsetning á það.