Haltu áfram að borga af láninu þínu

Lántakendur eiga í mörgum tilvikum kröfu á fjármögnunarfyrirtæki eins og Lýsingu vegna ofgreiðslna af gengistryggðum lánum segir hæstaréttarlögmaður. Fólk eigi samt sem áður að halda áfram að greiða af lánunum þar sem vanskil setji skuldara í verri stöðu.

Skarphéðinn Pétursson lögmaður Borgarbyggðar sem vann mál gegn Arion banka á dögunum vegna vaxtaútreikninga sagði í fréttum okkar í gær að níu af þeim ellefu prófmálum sem leysa áttu óvissu vegna endurútreiknings gengistryggðra lána væru í raun óþörf.

Hann segir ennfremur afstöðu Lýsingar órökstudda þar sem dómurinn fyrr í þessum mánuði eigi að hans mati skýrt við um bílalán líka.

„Sérstaklega í tilviki Lýsingar þá er alveg ljóst að mjög mörg lán, ef þau eru endurreiknuð samkvæmt Veritas-leiðinni, leiða til kröfu, það er að segja að lántakinn á inni kröfu. Það þýðir að með þessarri afstöðu þá er Lýsing í rauninni að taka lán hjá lántakanum með því að greiða honum ekki til baka og svo getur munað verulega á vöxtum, ef lýsing nær að halda þessu í tvö ár í viðbót," segir hann.

Hann segir því lántakandann því þurfa að gæta að sér og senda kröfu á lýsingu til þess að hann ávaxti sína umframgreiðslu með dráttarvöxtum.

Nú þegar nálgast mánaðarmót eru margir skuldarar í vafa um hvort greiða eigi af þeim lánum sem óvissa ríkir um endurútreikninga, Skarphéðinn segir fólk eigi samt sem áður að greiða af lánunum.

„Það hefur sýnt sig í þessum málum, til dæmis þessu Borgarbyggðarmáli, að það hefur ekki verið góð regla að borga ekki. Lántakandinn er aldrei í verri stöðu við að greiða enda hafa margsinnis komið fram fyrirvarar að endurgreiðsla komi ef ofgreitt hafi veirð, með því að setja lán í vanskil þá er lántakandinn að setja sig í verri stöðu," segir Skarphéðinn að lokum.