Lögreglumenn áhyggjufullir

Lögreglumenn á Vestfjörðum hafa þungar áhyggjur af fjárheimildum til lögreglunnar á svæðinu. Niðurskurður síðustu ára, auk þeirrar staðreyndar að lögreglan hafi ekki fengið að fullu bættar verðlagshækkanir og tilfærslur á kostnaði, sem færður hefur verið bótalaust yfir á rekstur lögreglunnar, hefur orðið til þess að rekstur lögreglunnar er kominn undir það sem hægt væri að kalla þolmörk.

Félagsfundur lögreglufélags Vestfjarða var haldinn í síðustu viku þar sem eftirfarandi ályktun var samþykkt.

„Sést þetta m.a. berlega í minni akstri lögreglubifreiða undanfarinna ára, sem aftur hefur bein áhrif á sýnileika lögreglu. Augljóst er að öryggi jafnt hins almenna borgara sem og lögreglumanna hefur stórlega látið á sjá.

Félagsfundurinn kallar þingmenn kjördæmisins, sem og sveitarstjórnarmenn á Vestfjörðum, til ábyrgðar í þessum efnum það að ekki fari verr en orðið er."