Norðmenn horfa til Íslendinga

Ítarleg umfjöllun er um lýðræðið á Íslandi á vef norska blaðsins Aftenposten nú um helgina. Tilefnið er að Norðmenn eru farnir að undirbúa sig undir þingkosningar á næsta ári, líkt og við sjálf. Í greininni er vakin athygli á því að Íslendingar hafi kosið um tillögur að nýrri stjórnarskrá í síðustu viku. Það eitt og sér sé ekki merkilegt, heldur hvernig leið var farin að því að móta þessar tillögur.

Greint er frá því að 25 ólíkir Íslendingar hafi verið valdir í stjórnlagaráð sem mótaði hugmyndirnar. Alþingi hafi síðan ákveðið að láta fara fram þjóðaratkvæðagreiðslu um tillögurnar. Þá er greint frá því að stjórnlagaráð hafi nýtt sér samfélagsmiðla eins og Facebook og Twitter til að kalla eftir hugmyndum við mótun hugmyndanna. Hundruð hugmynda og þúsundir athugasemda hafi borist. Þarna hafi nútímalýðræði verið iðkað.

Þá vekur Aftenposten líka athygli á því að borgaryfirvöld í Reykjavík hafi lagt meiri áherslu á aukið íbúalýðræði. Bent er á vefsíðuna betrireykjavik.is þar sem íbúar geti komið með tillögur að betrumbótum og kosið um þær. Borgarráð hafi síðan skuldbundið sig til að ræða að minnsta kosti 16 tillögur í hverjum mánuði. Með fréttinni er síðan birt mynd af Jóni Gnarr borgarstjóra í drag-klæðnaði.