Ríkissaksóknari óskar eftir krufningu vegna mannsláts á Hverfisgötu

Ríkissaksóknari hefur krafist krufningar á líkama manns sem lést á lögreglustöðinni á Hverfisgötu í gær. Karl á fimmtugsaldri lést á lögreglustöðinni um miðnætti í gærkvöldi, en maðurinn fékk skyndilega hjartastopp og báru lífgunartilraunir ekki árangur.

Samkvæmt upplýsingum frá lögreglunni sjálfri hafði maðurinn, sem var í haldi lögreglu þegar þetta gerðist, verið handtekinn skömmu eftir að tilkynnt var um að hann léti ófriðlega í miðborginni.

Lögreglan fór á vettvang og handtók manninn, sem veitti nokkra mótspyrnu. Í framhaldinu var hann fluttur á lögreglustöðina, en lést þar eins og áður sagði.

Samkvæmt upplýsingum frá lögreglunni var Ríkissaksóknara þegar gerð grein fyrir málinu og tók embætti hans yfir rannsókn þess lögum samkvæmt.

Þar á bæ fást eingöngu þær upplýsingar að óskað hafi verið eftir krufningu og framhald málsins ræðst meðal annars af niðurstöðu hennar.