Alls óvíst hver hinn látni er - lögreglan óskar upplýsinga

Svo virðist sem lögreglan viti ekki hver það er, sem fannst látinn í fjörunni í Keflavík um hádegisbil í dag. Eins og Vísir greindi frá fyrr í dag fannst lík þar. Lögreglan hefur varist allra frétta en sendi tilkynningu laust fyrir klukkan fjögur.

Þar kemur fram að um klukkan tólf í dag sá erlendur ferðamaður sem var við göngu niður við sjó í Keflavík lík í sjónum. Hann hafði samband við Neyðarlínuna í kjölfarið. Líkið fannst í klettóttri og stórgrýttri fjörunni neðan við gömlu sundhöllina í Keflavík og reyndist það vera af fullorðnum óþekktum karlmanni.

Lögreglan biður alla þá sem einhverjar upplýsingar geta gefið um mannaferðir á þessu svæði frá því í gærkvöldi að hafa samband við lögregluna á Suðurnesjum í síma 420 1700.

Lögreglan á Suðurnesjum rannsakar málið.