Myndskreytt líffræðikennslubók fyrir blinda

Nýútskrifaður grafískur hönnuður hefur útbúið myndskreytta kennslubók í líffræði fyrir blind og sjónskert börn, en slíkt kennsluefni þekkist varla hér á landi. Verkið hefur vakið talsverða athygli erlendis og hefur höfundur áhuga á að ráðast í gerð fleiri sambærilegra bóka.

Bókin er útskriftarverkefni Höllu Sigríðar í grafískri hönnun við Listaháskóla Íslands en hugmyndina fékk hún eftir að hafa komist að því að íslenskt námsefni blindra og sjónskertra byggist eingöngu á blindraletri.

„Þetta sat svo í mér að þegar kom að lokaverkefninu ákvað ég að reyna að fylla aðeins upp í þessa vöntun," segir Halla.

Halla ákvað að semja líffræðibók fyrri börn á aldrinum 6 til 8 og tók efni upp úr bókinni Komdu og skoðaðu líkamann sem er nú þegar kennd í skólum landsins.

„Það er semsagt fjallað um lög líkamans. Ég ákvað að skipta upp í húðina, vöðvana, beinin og innyflin," segir Halla.

Halla leitar nú eftir styrktaraðila til að geta gefið bókina út.

„Þá verður þetta prentað úr misþéttum gúmmíefnum þannig að barnið á að geta fundið muninn á hörðu beinunum og mjúku vöðvunum og ennþá mýkri innyflum," segir Halla.

Þrátt fyrir að einungis mánuður sé liðinn frá útskrift Höllu hefur verkefnið þegar vakið athygli erlendis og verið kynnt á ýmsum ráðstefnum. Fjallað verður um bókina í nokkrum erlendum tímaritum á næstunni og verður hún til sýnis á Þjóminjasafninu eftir helgi og öðrum sýningum erlendis síðar í mánuðinum, þar á meðal í New York.

„Þetta er náttúrulega bara dropi í hafið af því sem að vantar, það væri ótrúlega gaman að geta komið með lesefni kort og í rauninni allt það sem þau vantar," segir Halla.