Forgangsverkefni að útrýma kynbundnum launamun

Þingi BSRB var slitið síðdegis í gær. Kosningar í embætti BSRB fóru einnig fram í gær þar sem Elín Björg Jónsdóttir var endurkjörin formaður með miklum yfirburðum. Þá kemur Snorri Magnússon, formaður Landsambands lögreglumanna, nýr inn í framkvæmdanefnd BSRB en hann var kosinn gjaldkeri.

Í ályktun um jafnréttismál sem samþykkt var á þinginu er þess krafist að vinna við styttingu vinnuvikunnar fari nú þegar af stað auk þess sem kynbundinn launamunur verði upprætur.

Svo segir í ályktuninni að launamunurinn hafi verið nokkuð í umræðunni undanfarið eftir að ný kjarakönnun BSRB leiddi í ljós rúmlega þrettán prósent óútskýrðan launamun á milli kynja.

BSRB krefst þess að kynbundnum launamun verði útrýmt með auknu fjármagni og aðgerðum nú þegar. Það sé algert forgangsverkefni stjórnvalda, atvinnurekenda og verkalýðshreyfingarinnar að mati BSRB.