Tölvuþrjótar hringja aftur á íslensk heimili

Eitthvað hefur borið á því í vikunni útlendir einstaklingar hafi hringt á íslensk heimili og þóst vera starfsmenn tölvufyrirtækja, svo sem Microsoft, og reynt að beina fólki inn á sýktar heimasíðu í þeim tilgangi að komast yfir aðgang að heimilistölvum Íslendinga. Vísi bárust nokkrar ábendingar um þetta, en málið svipar til tölvuþrjóta sem hringdu hingað til lands í nafni Microsoft síðustu páska.

Þá hafði sama aðferð verið notuð til þess að plata íbúa í Noregi og var nokkuð um það fjallað í þarlendum fjölmiðlum fyrr á þessu ári. Svikahrapparnir eru sérlega sérlega slægir og sannfærandi í sínu. Þeir halda því meðal annars fram að einhver villa hafi komið upp sem viðkomandi þyrfti að bregðast við og báðu þeir svo fólkið um að setjast við tölvu sína og kveikja á henni.

Lögreglan á höfuðborgarsvæðinu sendi þá út tilkynningu þar sem varað var við svona svikum en íbúar hér á landi höfðu þá ekki komist í tæri við slíka svikara. Framkvæmdastjóri Microsoft á Íslandi sagði þá í viðtali við Vísi að starfsmenn Microsoft hringdu aldrei sérstaklega á heimili fólks með þessum hætti.

Besta ráðið er hreinlega að skella á þessa þrjóta en hægt er að koma ábendingum til lögreglunnar í gegnum veffangið svikapostur@rls.is.