Landsmönnum fjölgaði um 500

Landsmönnum fjölgaði um 500 á tímabilinu júlí fram í október, eða á þriðja ársfjórðungi. Í lok ársfjórðungsins bjuggu 320.660 á landinu. Um 160.870 karlar og 159.790 konur. Erlendir ríkisborgarar voru 20.820 og á höfuðborgarsvæðinu bjuggu 204.630 manns.

Fjöldi fæddra mun fleiri en þeir sem létust

Á 3. ársfjórðungi fæddust 1.230 börn, en 470 einstaklingar létust. Á sama tíma fluttust 280 einstaklingar frá landinu umfram aðflutta. Brottfluttir einstaklingar með íslenskt ríkisfang voru 590 umfram aðflutta, en aðfluttir erlendir ríkisborgarar voru 300 fleiri en þeir sem fluttust frá landinu. Fleiri konur en karlar fluttust frá landinu.

Flestir fóru til Danmerkur

Danmörk var helsti áfangastaður brottfluttra íslenskra ríkisborgara en þangað fluttust 550 manns á 3. ársfjórðungi. Til Danmerkur, Noregs og Svíþjóðar fluttust 1.440 íslenskir ríkisborgarar af 1.790 alls. Af þeim 470 erlendu ríkisborgurum sem fluttust frá landinu fóru flestir til Póllands, 120 manns.

Flestir aðfluttir íslenskir ríkisborgarar komu frá Danmörku eða 450, 270 frá Noregi , og 200 frá Svíþjóð , samtals 920 manns af 1.210. Pólland var upprunaland flestra erlendra ríkisborgara en þaðan fluttust 180 til landsins af alls 770 erlendum innflytjendum. Bandaríkin komu næst, en þaðan fluttust 60 erlendir ríkisborgarar til landsins.